كيفية انتاج لوتينو او البينو بدون صلع خلف التاج

احبتي في الله..

حبيت اطرح موضوع الصلع المرتبط بطيور الكوكاتيل اللوتينو والالبينو (وايت فيس لوتينو) لانه -في اعتقادي- يهم معظم مربي الكوكاتيل وخصوصا محبي اللوتينو والالبينو.. 
الموضوع اعتقد انه مش جديد وتم التطرق له في مرات سابقة كتير 
لكن يمكن ما تمتش مناقشته بشكل مفصل وعشان كده قررت اكتب فيه.



تعريفه..
الصلع بيكون خلف التاج مباشرة..
وهو عبارة عن جين بيتم توريثه للاجيال اللاحقة.. 
وهو مرتبط ومتأصل في طيور اللوتينو والالبينو.. والطائر الاصلع هو طائر يحمل زوج من الجينات دي.



الهدف..
الحد من مشكلة الصلع ثم القضاء عليها ان شاء الله.



سبب المشكلة؟
المشكلة ترجع الى قلة خبرة المربين في انتاج اللوتينو والالبينو.. 
فالمربي عشان ينتج البينو مثلا فأبسط شيئ بيعمله هوه انه يجوز ذكر البينو لانثى البينو 
بغض النظر اذا كان فيه صلع او لا.. المهم هوه عايز انتاج البينو وبس..
وبالتالي بيظهر الصلع في الابناء وبيكون المربي بالشكل ده مساهم فعال في زيادة المشكلة 
لانه حينتج طيور وحيبيع منها واللي حيشتري حيكمل المسيرة وحينتج منها وحيبيع وهكذا..



هل فيه حل للتغلب على المشكلة؟
هناك بعض الحلول -من وجهة نظري-:

1- تزويج الذكور (اللوتينو او الالبينو) الصلعاء لاناث رمادية (بخد لو حتتجوز لوتينو او وايت فيس لو حتتجوز البينو).
2- تزويج الذكور النورمال جراي سبليت لوتينو (او البينو) لاناث لوتينو (او البينو) الغير صلعاء.
3- تزويج الذكور اللوتينو (او الالبينو) لاناث لوتينو (او البينو) بشرط ان لا تكون هذه الطيور صلعاء.
4- عدم تزويج الاخوة لبعضهم.. وتغيير الدماء بشراء الذكور او الاناث من مربين اخرين.



اعتقد اننا جميعا كهواة مربين لو التزمنا بالنصائح دي..
في خلال سنتين او ثلاثة مش حنلاقي طائر اصلع عند حد فينا ان شاء الله.